CAGAYAN DE ORO CITY, Philippines – Nasanta sa California State Police ang usa ka lalaki nga nagbitbit sa armas pasulod sa political rally ni US Presidential Candidate Donald Trump.
Giila ni Riverside County Sheriff Chad Bianco ang nasikop nga suspek nga si Vern Miller, 49 anyos, ug walay permanenteng puy-an.
Nasikop ang suspek sa checkpoint pasulod sa Trump Rally Site.
Narekober sa posisyon sa suspek sulod sa iyang itom nga SUV ang gitaguan nga shotgun nga loaded sa bala ug laing duha ka short firearms nga puno usab sa buhing bala.
Nadiskobre sa mga kapulisan nga gadala-dala ang suspek sa peke nga pasaporte ug mga peke nga plaka sa sakyanan.
Wala pa maka-abot kang Trump ang report apan kusog ang pagtuo sa kapulisan nga posibleng dunay dautan nga laraw ang suspek sulod sa rally site.
