CAGAYAN DE ORO CITY – Gilayong gitahas ni Police Regional Office o PRO 10 regional director Brig Gen Jaysen De Guzman ang subsob nga imbestigasyon batok sa nagtagu-tago nila nga kaubang pulis nga nadakpan sa hiniusang operasyon sa lower units sa Brgy Iponan sa syudad.
Kini human isilbi sa team nila ni Bulua Police Station 7 commander Major Rey Gaban ang warrant of arrest sa kasong pagsupak sa Comphensive Dangerous Drugs Act of 2002 batok kang Police Staff Sgt Armand Tagolimot alyas ArTags sulod sa pinuy-anan niini.
Gibutyag ni De Guzman nga gusto niya ang dinaliang resulta sa imbestigasyon kung tinood ba nga kabahin si Tagolimot nga suspek pagpusil-patay kang Cogon Police Station commander Capt Abdulcahar Armama sa Brgy Bulua sa syudad sa miaging Oktobre 5, 2024.
Namahayag si De Guzman nga dili niya palabyon kung molugwa sa imbestiagsyon nga apil ang suspek sa nahitabo kang Armama.
Dumduman nga misaad ang heneral sa pamilya ni Armama nga dili hunungan ang pagpangita sa mga suspek aron mahatag ang hustisya sa gidangatan niini.
Apan ang maong mga pasangil ang hugot gihimakak ni Tagolimot ug namugo nga giplantingan kini’g mga ebedensiya aron madakpan.Hisayrang nakuhaan sa tulo ka armas,granada ug pipila ka gramo sa gitoohang shabu kagahapong adlawa.
