CAGAYAN DE ORO CITY-Dakpan sa mga otoridad ang drayber sa Toyota Innova human makuhaan sa mga armas ug granada sa Barangay Nangka, Balo-i, Lanao del Norte.
Nasikop sa gipahigayon nga checkpoint sa 2nd Mechanized Infantry Brigade ang suspek nga si Amiladin Pacalna.
Narekober sulod sa sakyanan ang duha ka kalibre .45 nga armas, tulo ka magazine nga may buhing bala ug usa ka hand grenade.
Depensa sa suspek, wala siya masayod nga adunay armas sulod sa sakyanan ilabina nga gisugo lang siya nga ihatod ang mga pasahero sa Tugaya, Lanao del Sur gikan sa Iligan City.
