CAGAYAN DE ORO CITY-Nangayo’g pagsabot ang Autonomous Region in Muslim Mindanao o ARMM sa mga bakwit kon nganong nalangan sa laing higayon ang pagtul-id sa nagusbat nga bahin sa Marawi City.
Kini human unang gisaad ni Pres Rodrigo Duterte nga modalikyat aron panguluhan ang ground breaking sa most affected area nga sugdan ang pag-ayo sa Marawi.
Gibutyag ni ARMM 1st Assemblyman Zia Alonto Adiong nga maoy gusto ni Duterte nga mismo siya ang mangunay sa groundbreaking hinungdan naatras sa laing higayon.
Gidumdom usab sa katawhan sa Marawi ang unang tuig sa pagkagawasnon nga gideklarar ni Duterte niadtong petsa 17 sa Oktubre 2017.
Gisabot sa gobierno ang pagka-dismaya sa pipila ka bakwit nga gipahulat-hulat nga magsugdan na ang pag-reconstruct sa Marawi.
Kini human unang mihimo usab sa lihok-protesta ang apektadong mga residente aron ipadumdom sa gobierno ang saad niini nga mabalik na sa normal ang ilang kinabuhi gikan sa kagubot.
Miingon si Adiong nga dili dautan ang gibating kaligutgot sa internally displaced persons o IDPs apan nagpadayag lamang sa tinood nga sitwasyon sa Marawi City.
Samtang miingon si Presidential spokesperson Salvador Panelo nga dili kalikayan ang kalangan tungod sa kadako sa giatubang nga problema.
Miingon si Panelo nga gamay’ng pag-antos na lamang sa mga bakwit kay himoon ni Duterte ang ground breaking sa katapusang bahin sa Oktubre ning tuiga.
