CAGAYAN DE ORO CITY – Giangkon ni Xavier University Student Involvement Advocacy Program head Nestor Banuag Jr. nga peligro sa recruitment sa CPP-NPA-NDF ang mga tinun-an ning syudad.
Kini tungod sa kalidad nga gibatonan sa mga estudyante nga nagtungha sa unibersidad sama sa Xavier University.
Gibutyag ni Banuag nga dili lamang sa akademiko nakapokus ang ilang basic education apan lakip usab sa ilang mission ug vision nga mao ang pagtabang sa mga lumad nga nagpuyo sa kabukiran.
Gani, gipasalig niini nga ang ilang pagtabang nakasubay sa balaod.
Samtang, gipamatud-an ni 58th IB,PA Brigade commander Lt Col Roy Anthony Derilo nga maglisod na ang rebeldeng New Peoples Army o NPA nga makapang-recruit sa mga bag-ong cadre sulod sa Xavier University.
Gibutyag ni Derilo kinsa kanhi miembro sa intelligence unit nga ilang gimonitor ang maong tunghaan ug nasuta nga gipahugtan na sa kadagkuan ang seguridad aron dili masudlan sa mga walhong grupo.
Asoy niini nga kini ang hinungdan kung nganong nakahimo sa recruitment sa laing tunghaan ang mga rebelde ilabina sa Central Mindanao University ug ubang tunghaan kay naglisod na sila nga makasulod sa Xavier University.
