Pinusasan ang mga kamot ug mga tiil ni expelled Negros Oriental 3rd District Representative Arnulfo Teves Jr nga gitugyan sa Timor Leste authorities sa Philippine government.
Kini human sugata sa Philippine Air Force ang pugante sa usa sa mga airport sa Timor Leste gikan sa gitaguan niini sa Dili City.
Walay gihimong pagpasabot ang mga otoridad sa maong nasud kung nganong apil ang mga tiil ni Teves nga gipasusan.
Dumduman nga sa pagdakop sa immigration police officers kang Teves sulod sa iyang balay niadtong Martes,nagka-komosyon pa ayha hingpit nadala sa temporaryong detention facility.
Si Teves ang gilauman moabot sa Villamor Airbase sa Pasay City gikan sa Timor Leste karong hapon.
Gilauman nga e-presenter kini sa media ayha isulod sa prisohan nunot sa iyang multiple murder cases nga giatubang tungod sa pasangil nga pagpapatay kang Negros Oriental Governor Roel Degamo ug walo ka political supporters sulod sa balay sa Pamplona town niadtong Marso 4,2023.
Naghulat na ang Bombo Radyo coverage team sa Villamor Airbase alang sa paghindangat ni Teves.
