CAGAYAN DE ORO CITY, Philippines – Personal nga miduaw si Cagayan de Oro Archbishop Jose Cabantan ang haya ni Lady Grace Galo, sulod sa ilang puy-anan sa Zone 4 Upper Dinogon, Sta Ana, Tagoloan Misamis Oriental.
Gipanalanginan sa arsobispo ang namatay nga 19 anyos nga dalaga, kinsa kanhi, aktibong sakristan sa simbahan sa Santa Ana.
Mibati sa tumang kasubo si Bishop Cabantan sa gidangantan sa babayeng sakristan, ilabe nga brutal ang kamatayon niini.
Mihandum si Cabantan nga makab-ot sa Pamilyang Galo ang hustisya nga ilang gipangita.
Gawas sa pagsilbing altar server, ilado usab ang biktima isip active youth minister sa maong parokya.
Una niini, mipasalig si Misamis Oriental Police Provincial Director Police Colonel Wilbur Salaguste nga masulbad na ang kaso ni Galo ning semanaha.
Nunot kini sa pagdeploy sa dugang police investigators aron matumbok kung kinsa ng mipatay sa dalaga.
Tolo na ka person of interest (POI) ang naidentipikar nga konektado sa pagpatay kang Galo.
Si Galo kasamtangang nagtungha isip 2nd-year Business Administration student sa Tagoloan Community College.
Ulahing napalgan ang lawas sa biktima nga naligo sa iyang kaugalingong duga human kini gidungab-patay, sulod sa ilang puy-anan, sa wala pa ilhing mga responsabli, niadtong Enero 10.
