Gipasalig sa Association of Southeast Asian Nations (ASEAN) ug Japan ang pagpalig-on sa ilang kooperasyon sa natad sa kalinaw, seguridad, kalig-on sa ekonomiya, enerhiya ug pagkaon atol sa ika-29 nga ASEAN-Japan Summit nga gipahigayon sa Manila karong Martes, Nobyembre 17.
Gipasiugda ni Presidente Ferdinand Marcos Jr. ang kamahinungdanon sa pagsalig tali sa mga gobyerno ug lig-on nga relasyon sa katawhan sa duha ka panig, ilabi na sa pag-abot sa ika-50 nga anibersaryo sa Fukuda Doctrine sa 2027.
Lakip sa mga prayoridad sa kooperasyon ang pagpalig-on sa depensa ug seguridad sa kadagatan, ingon man ang hiniusang paningkamot batok sa transnational crime, online scams ug cyberthreats.
Gipalawom usab sa duha ka panig ang ilang kooperasyon sa ekonomiya ubos sa Regional Comprehensive Economic Partnership (RCEP) ug ASEAN-Japan Comprehensive Economic Partnership (AJCEP), lakip ang paghisgot sa posibleng pag-upgrade sa maong kasabutan.
Gawas niini, gilusad usab sa Japan ug ASEAN ang Japan-ASEAN AI Safety and Security Partnership aron matubag ang mga bag-ong hulga nga mahimong motumaw tungod sa paspas nga pag-uswag sa artificial intelligence (AI), samtang gipadayon ang inisyatibo sa hiniusang pagpalambo sa teknolohiya. (raniel mahunyag)









