CAGAYAN DE ORO CITY – Atubangon sa mga personalidad nga utok sa pagkaylap sa mga sigarilyong ismagol ang kasong pagsupak sa Graphic Health Warnings Law sa piskalya sa Bukidnon.
Gitaho sa lower units sa Don Carlos Municipal Police Station ug Valencia City Police Station kang Police Regional Office 10 Director Brig Gen Ricardo Layug Jr nga milusad sila sa magkalahing operasyon alayon sa kasuguan ni PNP chief Gen Rommel Marbil nga anti-smuggling operations.
Subay sa nakuptan nga datos sa heneral pinaagi sa PRO 10 Regional Information Office nga dunay nadakpan ang Don Carlos MPS nga 29 anyos nga indibidwal nga taga-Maramag nga giingong aktong nasapon namaligya sa ismagol nga mga sigarilyo sa tindahan sa Brgy Kasigkot sa maong lungsod.
Nabawi gikan sa suspek nga si alyas Boy Ismagol ang 22 ka nagkadaiyang reams sa sigarilyo nga klase-klaseng brand nga nagkantidad sa dul-an 7-mil pesos.
Samtang sa operasyon usab sa Valencia City PNP ila nalusob ang daghang mga tindahan nga nagbaligya’g inismagol nga mga sigarilyo sa Brgy Poblacion.
Kini gilakipan sa dul-an 70 ka reams sa klase-klaseng sigarilyo nga dunay bana-bana nga balor sa 23-mil 800 pesos.
Panganti ni Layug nga dili mohunong ang PRO 10 pinaagi sa ilang lower unit operatives paggukod sa mga sakop sa sindikato hangtod mabungkag ang smuggling activities dinhi sa Northern Mindanao.
