GIPASIUGDA ni Bien Gonzales sa grupong August Twenty One Movement (ATOM) ang kahinungdanon sa pagdumdum sa mga icons sa demokrasya sa nasud sa umaabot nga anibersaryo sa EDSA People Power.
Sumala ni Gonzales, ang paghinumdom sa mga nahimo sa mga lider ug aktibista sa kaniadto nagpahinumdom sa katawhan sa kahimtang sa kagawasan nga ilang nakab-ot ug sa kahayag nga nadala niini sa nasud human sa pang-abuso ug kontrol sa militar kaniadtong panahona.
Gipunting usab niya nga ang kagawasan nga nasinati karon sa mga Pilipino kinahanglan protektahan ug ipadayon alang sa umaabot nga henerasyon, ilabi na sa mga kabataan nga magdala sa responsibilidad sa pagpabilin sa demokrasya.
Alang kaniya, ang selebrasyon sa EDSA People Power dili lamang paghinumdom sa kagahapon, kondili pagtul-id sa kahulugan sa kagawasan ug pagpasiguro nga kini dili malimtan ug mapanalipdan sa mga musunod nga henerasyon. (James Oliver)
