CAGAYAN DE ORO CITY – Gitawag sa kampo ni Carmen Punong Brgy Kikang Uy nga ‘one sided’ ang gihimong pagdungog sa House Commitee on Suffrage and Electoral Reforms sa kamarabaha sa kauluhan.
Kini maoy reaksyon sa gipabati sa abogado ni Uy nga si Atty Al Geñoso sa ilang gidangatan sa maong pagdungog diin wala sila makapasabot sa isyu nga gipasangil ngadto sa ilang kliyente nga unod sa imbestigasyon sa maong komitiba.
Gibutyag ni Geñoso naka-sentro lang sa Comelec ang mga pangutana diin may mga higayon pa nga nasupalpal ang gipresentar nga giingong ebedensiya kabahin sa pasangil nga mani-obra sa rehistro sa mga botante sa Brgy Carmen sa miaging tuig.
Maoy gitumbok ni Geñoso ang panaghap nga adunay taga-city hall nga empleyado nga gi-destino sa 1st District Comelec Office nga naghimo’g maniobra apan paspas kini gisupla kay walay kamatuoran.
Nagpasabot daw kini nga naghimo’g eksena ang nangakusar atubangan sa komitiba aron isukip sa mga huna-huna sa katawhan nga seryoso ang nahitabo nga iregularidad sa voter’s registration process.
Nakurat lang usab ang legal team ni Uy nga sa kata-as sa panahon nga namasangil ang pikas panig,duha lang ka giingong testigo ang nahutpan ug gigamit niini sa maong pagdungog.
Dumduman nga sa pagtubag sa legal team ni KapKip sa disqualification case nga giduso sa Comelec,libuang exhibits ang ilang napadala aron matud-an nga dili tinood ang pasangil sa mga kaatbang nila sa politika rason kalit nga gisibog.
Hisayrang giakusar nga tungod sa naabusaran nga paghatag sa brgy residence certificates,grabe usab ang pagsaka sa mga bag-ong botante nga anaa sa maong brgy.
