Nalooy si kanhi City Mayor ug Xavier University Law Professor Atty. Oscar Moreno sa kahimtang ni Barangay Pagatpat Punong Barangay Achilles Jude Babaran human kini makadawat og kalit nga dismissal order office of the Ombudsman.
Gipahayag ni Atty. Moreno ang iyang kabalaka sa maong isyu tungod kay nakita niya kini nga usa ka paagi sa pagpugong sa tinuod nga mando sa katawhan pinaagi sa mga legal nga maneuverings.
Bisan pa sa kamatuoran nga ang administrative case nagagikan pa niadtong tuig 2017, gipunting sa kanhi mayor nga wala kini angay ikabalaka karon tungod kay napili si Babaran pinaagi sa eleksyon sa 2023.
Hinuon, gidayeg ni Atty. Moreno ang desisyon ni Kapitan Babaran nga dili mopahigayon og people power aron malikayan ang posibleng kagubot nga makapasakit sa mga residente sa maong barangay.
Subay niini, giawhag niya ang pag-file og pormal nga legal nga aksyon isip maoy tukmang pamaagi sa pagsulbad niining maong problema imbes nga moagi sa mga pamaaging makapahisalaag sa tingog sa mga lumulupyo.
