Gikuwestiyon ni kanhi City Mayor Atty. Oscar Moreno ang pag-implementar sa dismissal order batok kang Barangay Pagatpat Punong Barangay Achilles Jude Babaran tungod sa pagkalangay niini sulod sa daghang katuigan.
Subay sa iyang pagpasabot, ang maong administrative case nagagikan pa niadtong tuig 2017 diin ang silot nga perpetual disqualification gipadapat lamang sa re-employment sa gobyerno ug dili sa posisyon nga makuha pinaagi sa eleksyon.
Gipunting sa kanhi mayor nga sa dihang midagan ug napili si Babaran sa eleksyon niadtong 2023, dili kini tinudlo nga posisyon kundi mandato mismo sa mga lumulupyo sa Pagatpat.
Hinuon, nagpahayag og kahingangha si Atty. Moreno sa timing sa pagpabuhi niining karaang desisyon ilabi na nga wala may bag-ong mga kaso nga gipasaka batok sa kapitan.
Bisan pa niini, gipamatud-an sa maong abogado nga wala siyay problema sa lagda sa succession, apan gikuwestiyon niya ang rason sa pagtangtang karon kang Babaran base sa usa ka desisyon nga lima ngadto sa unom ka tuig na ang milabay.
