Nasakmit ang sobra ₱1.5 milyones ka pesos nga balor sa mga smuggled nga baterya human masikop ang usa ka Australian national sa Barangay Iponan, Cagayan de Oro City.
Nasikop sa mga sakop sa CIDG Cagayan de Oro ang 59 anyos nga si alyas Frank tungod sa ilegal nga pagbaligya ug pag-apod-apod og mga imported nga baterya sa sakyanan nga gikan sa China ug walay permit gikan sa DTI.
Gipadayag ni Police Brigadier General Aaron Mandia, Officer-in-Charge sa PRO 10, nga walay DTI permit ug ICC stickers ang kapin upat ka gatos ka mga nakumpiskang baterya human sa tulo ka bulan nga pagpaniid sa maong foreigner nga nag-abang ra og balay sa maong dapit.
Labaw pa niini, nag-atubang na karon ang maong suspek sa kasong paglapas sa Consumer Act ug mga regulasyon sa pamatigayon human nakuhaan og lima ka mga buy-bust item, buy-bust money, ug nagkadaiyang klase sa baterya nga moabot sa kinatibuk-ang ₱1,582,400.00 ang halaga.
Subay sa maong kalampusan, gipasalig sa pamunoan sa kapulisan nga pahugtan pa nila ang pakigtambayayong sa ubang ahensya aron mapanalipdan ang mga konsumedor ug masumpo ang ilegal nga negosyo sa rehiyon.
