CAGAYAN DE ORO CITY – Gimando ni Misamis Oriental PNP Provincial Director Police Col. Gonzalo Villamor Jr nga ipadali ang pagsulbad sa pagtigbas-patay sa multi-awarded nga retired police officer sa Brgy Balacanas,Villanueva ning lalawigan.
Kini human brutal ang kamatayon sa biktima nga si retired Police Maj. Lorenzo Larot Sr,63 anyos,minyo nga nagpuyo sa maong lugar.
Miingon si MisOr PNP spokesperson Police Lt. Pia Theofratus nga maoy responsable sa pagpatay sa biktima ang kaulingong anak niini nga si Lorben Larot kinsa paspas misibat pagkahuman sa kremin kagahapon sa buntag.
Namahayag si Theofratus nga ang grabeng bangi sa pamilya ang nag-unang hinungdan kon nganong miresulta sa dugu-ong kremin hitabo kagahapon.
Hisayrang si Larot Sr ang back to back awardee isip outstanding police officer ayha kini mi-retiro sa serbisyo tuig 2016.
