CAGAYAN DE ORO CITY – Gidala na ang patay’ng lawas ni Reggie Pabila Saraos sa Sitio Parola, Brgy Macabalan ning syudad, human kini malatayan sa 10-wheeler truck sa Balingoang Misamis Oriental.
Milugwa sa imbestigasyon sa Balingoan Municipal Police Station nga mi-angkon ang motorista nga si Arbee Julian Saraos, 35 anyos, nga naka-inom kini atol sa ilang pagbiyahe gikan Gingoog City padulong Balingoan.
Apan namugos ang motorista nga gamay ra ang iyang na-inom nga bino ug dili kini hinungdan sa pagkamatay sa iyang misis nga si Reggie Pabila Saraos.
Kung mahinumduman nga namugos ang driver sa truck nga nailang si Marvin Seith, 38 anyos nga taga Tubod,Lanao del Norte, nga nangawat sa linya ang magtiayong motorista ug nadigyas ang ilang motor sa usa ka construction site hinungdan nga naitsa ang babayeng biktima sa pikas lane ug ilang kalit nga naligsan.
Gitin-aw ni Patrolman Carl Arado Reyes, imbestigador sa Balingoan Municipal Police Station nga gikustodiya nila ang driver sa truck human sa insidente.
