CAGAYAN DE ORO CITY – Naharang sa Laguindingan Airport, Misamis Oriental ang usa kababaye nga nagdalag armas kagahapon.
Giila ang suspek nga si Yasmon Macabago Abdulgani, 40-anyos ug molopyo sa Brgy Narra, Balabagan, Lanao del Sur.
Subay sa report sa Laguindingan Police Station nga padulong unta si Abdulgani sa kauluhan, nakalusot pa kini sa X-ray machine sa entrance sa airport apan sa wala pa kini makaabot sa boarding area nabantayan ang kadudahan nga butang sulod sa iyang bag.
Nakuha sa iyang posisyon ang calibre 22 nga armas nga gipailawman sa bugas nga iyang gidala.
Depensa sa suspek nga gipadala lamang sa iyang higala ang maong armas ug ipahatag sa ig-agaw niini.
Gihikay na ang kasong kalapasan sa Republic Act 10591 o illegal possession of firearms nga ipasaka batok sa suspetsado.
