Posibleng mag-atubang sa backlash gikan sa ilang mga constituents ang mga kongresista nga mibotar pabor sa impeachment ni Vice President Sara Duterte sa miaging Lunes.
Apan bisan pa sa posibilidad niini, nagtuo si Dr. Christopher Ryan Maboloc, Associate Professor sa Ateneo de Davao University, nga tungod kay gullible o dali ra mailad ang katawhan, posibleng mamanipula gihapon sila sa mga opisyal ug malimtan ang ilang kasuko batok sa mga kongresista nga mibotar aron ipatangtang sa puwesto ang ilang gisuportahan nga si Vice President Sara Duterte.
Butyag ni Maboloc nga lakip sa posibleng makaapekto sa desisyon sa katawhan sa umaabot nga eleksyon mao ang duha ka tuig nga paghulat nga mahimong rason nga malimtan na ang nahitabong pag-uyon sa ilang mga representante.
Matod pa niya, botaran lang gihapon kini sa katawhan tungod kay nahimo nang kultura sa nasud ang patronage system.
