CAGAYAN DE ORO CITY – Nanumpa na si Undersecretary Ma. Cristina Aldeguer – Roque isip Acting Secretary sa Department of Trade and Industry (DTI). Gituboy ni Presidente Ferdinand Marcos Jr., si Roque human miluwat sa puwesto si Trade Secretary Alfredo Pascual, epektibo Agosto 2, kagahapong adlawa.
Naila si Roque isip “key personality” sa pagsulod sa Micro, Small and Medium Enterprise o MSME Development Group sa DTI ug daku ang iyang kontribusyon sa pagpanday sa mga programa nga makapukos sa pagpalambo sa MSME’s.
Sa wala pa niya madawat ang bag-ong poste, iya una gidumala ang Bureau of Small and Medium Enterprise Development, Bureau of Marketing Development and Promotions, OTOP Program Management Office, Comprehensive Agrarian Reform Program Management Office, ug ang Small Business Corporation and the Cooperative Development Authority.
Kini ang nagpalig-on sa pagkakandidato ni Roque aron ituboy ni Presidente Marcos sa usa sa labing importante nga ahensya sa gobyerno.
Una niini, gidepensa ug gipamugos ni Pascual nga dili “rushed decision” ang iyang pagbiya sa gabinete ni Marcos, human mihungaw ang espekulasyon nga langkaton siya sa puwesto ug pulihan sa mas bata nga kandidato.
