Moagi na sa bag-ong rota ang gipangandaman nga Street Dancing Competition karong Agosto 26.
Gikan sa Limketkai Center, moagi kini sa C.M. Recto Avenue paingon sa Velez Street ug mohunong sa Don Gregorio Pelaez Sports Center, matud pa ni Acting City Tourism Head Marky Jalapadan.
Gipahibalo usab sa opisyal nga wala na’y Float Competition karong tuiga. Apan gitugotan gihapon ang mga float gikan sa mga non-profit organization ug sponsors nga gustong moapil sa Civic Military Parade ug Marching Band Competition karong Agosto 27 bisan dili kini contest.
Sa karon, miabot na sa 186 ang nakumpirma nga grupo nga mosalmot. Mas ubos kini gamay kumpara sa 220 sa miaging tuig, apan gilauman nga mosaka pa kini sa dili pa mag-Agosto 10—ang katapusang adlaw sa rehistrasyon.
Tungod niini, nanawagan si Jalapadan sa mga gustong moapil nga magpalista na dayon. Nagpadayon usab ang ilang mga tigom aron masiguro nga mahuman ang dako nga parada sa dakbayan sa dili pa mag-udto.
