Kinahanglan adunay tarong ug lawom nga dayalogo tali sa Department of Education ug mga magtutudlo kabahin sa plano nga pagbag-o sa school calendar ngadto sa three-term setup, sumala ni Jeany Rose Hayahay, usa ka lumad volunteer teacher.
Matud ni Hayahay, dako na usab ang kabug-at nga ginapas-an sa mga magtutudlo sa nasud, ilabi na sa pag-adjust sa lesson plans ug uban pang buluhaton nga kauban sa matag pagbag-o sa sistema sa edukasyon.
Dugang pa niini nga bisan kaniadto sa implementasyon sa K to 12 daghan na ang mipahayag og kabalaka, apan wala matud pa mapaminawi sa hingpit ang mga teachers nga direktang naapektuhan sa polisiya.
Gipasabot usab ni Hayahay nga dili lamang klasehanan ang giatiman sa mga magtutudlo tungod kay sila usab ang nagaasikaso sa brigada eskwela, pagpintal ug ubang preparasyon matag pagsugod sa klase.
Tungod niini, nanawagan ang maong volunteer teacher nga paminawon sa DepEd ang konkretong kahimtang sa mga magtutudlo aron malikayan ang dugang kabug-at sa ilang trabaho sa ilawom sa bag-ong school calendar setup.
