CAGAYAN DE ORO CITY – Hingpit nang gibalibaran ni opposition City Councilor Yevonna Yacine ‘Yvy’ Emano ang tanyag nga magsilbing chairman sa arbitration committee sa 20th city council ning syudad.
Kini human dili makadawat ang batan-ong Emano nga siya lang sa unom ka opposition city councilors ang konohay gihatagan ug gilayong gihakop na sa mayoriya ang dagkong mga komitiba sa konseho.
Miingon si Emano nga wala gani siya konsultaha sa mayoriya kabahin sa ilang kagustuhan nga siya ang ipahawid sa maong komitiba.
Una nang nagkainitay sa miaging semana nga sesyon ang duha ka panig kay namugos ang minoriya nga hataga’g mga komitiba apan hugot gibarugan sa mayoriya nga anaa kanila ang kontrol.
Hisayrang hapsay lang ug dili init ang ikatulong regular session sa konseho kagahapong adlawa.
