CAGAYAN DE ORO CITY – Nabutang na peligro ang seguridad ni adhoc committee chairman Kag. James Judith nunot sa subli pag-imbestigar sa sobra 700 milyones nga ayudang pinansyal alang sa mga apektadong pamilya sa COVID-19 pandemic sa syudad.
Gihimo ni Judith ang pagbulgar human gi-kuwestiyon sa mayoriya ang iyang findings sa re-investigation sa special ECQ ayuda nga daw nakalapas sa house rules sulod sa konseho.
Gisaway sa mayoriya ang paagi ni Judith nga inisyal nagpahinabi sa media kaysa unahon unta’g hatag sa committee report si committee on social services chairman Konsehal Girlie Balaba nga maoy nagmugna sa adhoc committee alang sa re-investigation.
Apan katurungan ni Judith nga wala niya hatagi sa kopya si Balaba kay mismo ang 19th city council dunay depekto sa pag-imbestigasyon sa miaging administrasyon.
Samtang giduso na ni Balaba ang iyang reklamo sa komitiba sa etchics batok kang Judith.
Kini human nagtoo si Balaba nga gibalewala lamang ni Judith ang iyang komitiba kabahin sa findings sa reinvestigation sa special ECQ ayuda.
Namahayag ang konsehala nga kon basehan ang mga aksyon nga gihimo ni Judith,dayag nga nasupak niini ang parliamentary procedures sa konseho rason nga angay kining silotan.
