CAGAYAN DE ORO CITY – Gipanganti ni Police Regional Office 10 Director Police Brig Gen Lawrence Coop nga manubag ug makasuhan kon molugwa sa imbestigasyon nga gi-unay sa pagpatay ang ilang kaubang pulis samtang naka-duty sa 2nd platoon sa 1004th detachment base sa lungsod sa Kalilangan,Bukidnon.
Kini human nakit-ang patay na nga gilabay sa suba si Patrolman Jeffrey Dabuco nga unang nawala sa kadlawon sa Hunyo 24 ning tuiga.
Miingon si PRO 10 spokesperson Police Maj. Joann Navarro nga unang mihimo sa pagpangita ang team ni 1004th Mechanized Company Police Lt. Eleno de la Cruz Ilustrismo Jr nga ubos sa RFMB 10 sa nawala nga si Dabuco apan sa suba na sa Purok 2,Brgy Panang,Wao,Lanao del Sur nakit-an ang patay’ng lawas sa biktima.
Tungod niini,gilayong gimando ni Coop nga ipaubos sa camp restriction si Ilustrismo;Patrolman Lunnel Dapar;Cpl Robert Jun Singcay;Cpl Neil Magriña ug Cpl Ivan James Prado samtang gihimo ang subsob nga imbestigasyon.
Subay sa mga impormasyon nga nakuha sa Bombo Radyo,nasuko si Singcay ug Magriña kay nalitok ni Dabuco samtang sila nag-inom nga giigom sa duruha ang suburno gikan sa giingong naglihok nga ilegal nga kalihukan sa lugar.
