CAGAYAN DE ORO CITY – Moduyog sa krusada sa katawhang apektado sa demolasyon sa korte ang konseho kon matood nga paputla’g koneksyon sa koryente ug tubig sulod sa duha ka lote nga gilantugiang legal tali sa 4ID,Philippine Army sulod sa Camp Evangelista,Barangay Patag sa syudad.
Kini ang panganti ni Patag Punong Brgy Eric Abaday nunot sa nagkatag nga impormasyon nga sugdan’g putlan sa koryente’g tubig ang libuang mga residente nga maigo sa demolasyon sa sunod semana.
Miingon si Abaday nga nasayod sila sa hukom sa korte suprema nga nagsulti nga nagpabor sa 4ID ang hukom alang sa disputed military reservation nga mga duluna sulod sa kampo.
Apan mihangyo usab kini sa kadagkuan sa kampo nga kon mahimo hulaton una ang hukom sa lokal nga korte diin nagduso’g motion to quash ang dehadong mga pamilya kay gikuwestiyon nila ang giingong pagbalik public domain sa maong kayutaan.
Kini ang rason nga manungay kini’g babag kon tinood nga sugda’g putol sa mga sundalo sa suplay sa tubig,koryente ug dili na paagion pasulod sa kampo ang mga tawo.
Kini tungod kay lahi na usab nga isyu kon matood nga mohimo niini ang mga sundalo.
Samtang wala pa’y tubag niini ang panig sa mga sundalo pinaagi sa Division of Public Affairs Office.
Apan sa unang mga interbyu sa Bombo Radyo,namulong sila nga dugay nang gideklara sa national govt nga military reservation ang maong mga ayuta rason nga angay dili kini magamit sa pribadong mga tawo.
Kini ang rason nga naghukom ang korte suprema pabor sa mga sundalo kay ensakto ang baruganan sa Armadong Kusog sa Nasud pag-abot sa maong isyu.
Dumduman nga nalangan nag pag-demolish sa dili moubos sa 400 ka balay kay nanghangyo pa niini sila City Mayor Rolando Uy,Provincial Govenor Peter Unabia ug Cagayan de Oro 1st District Rep. Lordan Suan nga masibog una sa miaging mga bulan kay nagtungha pa ang mga bata.
