CAGAYAN DE ORO CITY – Gi-anunsiyo sa Bombo Radyo ni Filipino molecular biologist Dr Don Valledor nga nakabase sa United Kingdom nga posibleng maggamit na sa katapusan nga bahin sa bulan sa Agosto ang bakuna batok sa Covid-19.
Siya miingon nga pasado sa clinical trials sa Phase 1 ug Phase 2 ang maong bakuna diin epektibo ang resulta niini.
Apan gibulgar ni Valledor nga maoy nagsilbi nga dakong hagit kanila nga dili masabotahe sa private enterprises ang presyo sa bakuna nga mapalit sa Pilipinas sa kantidad nga P100.00.
Una nang gipaubos sa clinical trials ang 300 ka tawo isip partisipante sa sensitibo nga ekspyermento sa health experts.
Samtang gibutyag usab ni Valledor nga gisugdan na sa United Kingdom ang paggamit sa tambal nga Dexamethasone batok Covid-19.
Miingon si Valledor nga ilang paimnon sa 6 milligrams sa Dexamethasone matag adlaw ang mga pasyente sulod sa 10 ka adlaw.
Asoy niini nga anaa sa tag-P6.00 lamang ang presyo sa steriod sa Pilipinas apan nagpahimangno kini sa publiko nga dili moinom kon walay prescription gikan sa doktor.
Hisayran nga ang United Kingdom ang ikatulo sa nagbaton sa pinakadaghan nga ihap sa mga namatay gumikan sa Covid-19 sa tibook kalibutan.
