Giduso ni City Councilor Joyleen Mercedes “Girlie” Balaba ang pagpreserbar sa Searsolin Building nga nahimutang sulod sa Xavier University Manresa campus sa Cagayan de Oro City, samtang padayon ang “Campus of the Future” project sa Cebu Landmasters Inc.
Sa iyang report sa City Council, gipadayag niya nga adunay mga alumni nga supak sa proyekto tungod sa giingong kasaysayan, edukasyonal ug sosyal nga bili sa maong estruktura.
Matod niya, ang Searsolin nga gitukod niadtong 1964 adunay dakong papel sa paghulma sa rural development leaders sa Asia, Africa ug Oceania, ug kabahin sa legacy ni Fr. William Masterson SJ.
Gisugyot usab sa konseho nga tan-awon kon ang building ipreserbar, i-conserve, i-adapt og laing gamit, o posible ba nga i-demolish depende sa resulta sa umaabot nga hearing.
Gilauman nga magpahigayon og joint hearing ang tourism ug agriculture committees uban sa pag-imbitar sa Cebu Landmasters ug Xavier University aron mapadayag ang ilang mga posisyon sa maong isyu.
