CAGAYAN DE ORO CITY – Nagkatinubagay sila adhoc committee chairman Kag James Judith ug social services committee chairperson Konsehala Girlie Balaba kabahin sa isyu sa nahatag nga ayudang pinansyal gikan kang kanhi Pres Rodrigo Duterte balor 767 milyon pesos alang sa katawhan sa dakbayan nga apektado sa enchanced community quarantine epekto sa COVID-19 miaging tuig.
Kini human sugdi na’g imbestigar ang giingong daghang ihap sa indigent families nga nalista sa kabarangayan apan nangawala pag-abot sa finalist listing sa DSWD-10 ug CSWD sa syudad.
Miingon si Balaba nga dili angay kuwestiyonon ang inisyatiba ni Duterte nga pagtabang sa city govt kaniadto kay kaugalingon daw niya kadto nga pondo ang gigamit.
Apan gipadumduman ni Judith si Balaba nga salapi sa katawhan ug dili kang Duterte ang gihatag ngadto sa DSWD aron ipang-apud apod sa 292-mil 736 ka pamilyang kabus dinhi sa dakbayan sa miaging tuig.
Samtang gisungag pag-apil ni Balaba ang isyu sa pag-angkon sa opisina ni Cagayan de Oro 2nd District Rep.Rufus Rodriguez sa pipila ka ‘in-kind’ ayuda gikan sa DSWD diin nakapatik ang iyang pangalan.
Namugos si Balaba nga kon subli giimbestigaran pagbalik ang ECQ special ayuda isyu,angayang ma-imbestigaran usab sa komitiba ang gihimo sa kongresista.
Apan gipasabot ni Judith nga naporma ang komitiba dili tungod sa gihimo ni Rodriguez apan gumikan sa daghang residente nga nalista ug nakapirma sa ECQ special ayuda apan sa tinud-anay walay aktuwal nga nadawatang salapi.
Dugtong niini,gikompirmar ni City Vice Mayor Jocelyn ‘Bebot’ Rodriguez nga tinood nga nasipyat ang pipila ka trabahante ni Rodriguez ug nabutanga’g pangalan ang pipila ka ‘in-kind’ DSWD boxes isip ayuda sa katawhan tungod sa pandemya.
Kini ang tubag ni Rodriguez gumikan sa pagtipas ni Balaba sa pinaka-isyu sa imbestigasyon kabahin sa ECQ special ayuda sa konseho kagahapon sa hapon.
Gibutyag ni Rodriguez nga nangayo na’g pasaylo ang kongresista sa kasaypanan sa iyang pipila ka mga empleyado ug nanganti nga dili kadto subli mautro.
Nunot usab niini,gi-suhestiyon ni CdeO SK Federatiojn President Kagawad John Michael Seno nga limpyuhan una ang mismong buhatan sa CSWD pag-abot sa mga paghatag ayudang pinansyal ug in-kind kaysa mangilabot ang syudad sa ubang ahensiya sama sa DSWD-10.
Kini sa tuyo nga dili na mautro ang pagyagaw sa paghawid sa mga listahan sa mga tawo nga maka-benepisyo kon may mga tabang nga itunol ang gobierno sa katawhan nga apektado sa kalamidad o trahedya.
Wala makaangay si Seno sa pagtinudluay sa city govt ug DSWD kon kinsa ang dunay kapalpakan sa panahon nga gihatag ang mga ayudang pinansyal sa labing mga apektadong mga pamilya sa pandemya dinhi sa dakbayan sa miaging tuig.
