CAGAYAN DE ORO CITY – Gilusob sa hiniusang puwersa sa kapolisan pinanguluhan sa Criminal Investigation and Detection Group o CIDG 10 ang usa sa mga pinuy-anan sa negosyanteng Intsik nga si Antonio Mahestrado Lim alyas Tony Yang sa Brgy Cugman ning syudad.
Kini human nakadawat sa impormasyon ang CIDG 10 nga nagbaton sa halos napulo ka nagkadaiyang klase sa armas si Yang rason nangayo sila’g pagtugot gikan sa korte.
Miingon si Police Lt Merjun Pablero,deputy city chief sa CIDG 10 nga sa pagsulod nila sa duha ka andana nga balay ni Yang,wala na sila’y naabtan nga tawo ug negatibo usab sa mga armas nga gisugo kanila sa korte nga kuhaon.
Siya miingon nga posibleng taud-taod nang walay puy-i ang maong balay kay napuno na usab kini sa abog dihang nasudlan nila kagahapon sa buntag.
Si Yang ang kontrobersyal tungod sa pasangil nga apil kini sa illegal POGO operations nga gipadagan ni detained kanhi Bamban Tarlac Mayor Alice Guo.
Sa pikas bahin, gi-depensa sa CIDG 10 kon nganong ulahi na ang ilang paglusob sa puy-anan ni Yang.
Kini bisan kon magpila ka bulan na ang pagbuto sa isyu sa illegal POGO operations diin kabahin si Yang nga giakusahan nga nagpadagan niini.
Miingon si Pablero nga taas ang proseso sa pag-aplay sa search warrant sa korte rason nga naabtan sa pila ka adlaw ang paggawas niini.
Siya miingon nga basta-basta makumbensir ang korte sa paglugwa sa maong dokumento kon huyang ang impormasyon ug dad-on nga informant alang niini.
