CAGAYAN DE ORO CITY – Naugdaw ang dakong balay nga gihimong boarding house sa Carcosa Compound,Sitio Singapore, Brgy Balulang ning syudad kagabii.
Gibutyag ni Senior Fire Inspector Willie Tan,Chief Operation Cagayan de Oro Fire District nga gipanag-iya ni Balulang Brgy Kag Alfredo Carcosa ang nasunog nga balay nga dunay 24 ka lawak.
Mi-angkon si Tan nga nagkalisod sila sa pag-kontrol sa kalayo kay distansiya ug pi-ot usab ang dalan.
Hinoon walay angol sa maong sunog.
Wala pay lead ang mga otoridad sa hinungdan sa sunog nga dunay gibana-bana usa ka milyon ka pesos ang structural damage.
Samtang giangkon ni Carcosa nga mismo sa iyang kuwarto nagsumikad ang kalayo nga hinungdan sa pagkasunog sa ilang pinuy-anan kagabii.
Miingon si Carcosa nga ang depektoso nga linya nila sa koryente ang sinugdanan sa kalayo ilabina nga 26 ka tuig na ang iyang pinuy-anan nga gihimo usab nga boarding house.
Apan nagpasalamat na lamang usab si Carcosa nga walay bisan unsa sa iyang kabanay ug 24 ka boarders nga naangol sa hitabo.
