CAGAYAN DE ORO CITY-Boluntaryong mitahan sa kapolisan ang balot vendor nga midunggab patay sa lalaking hubog sa dalang Velez ning syudad.
Ang suspek naila nga si Francis Dulawta, 33-anyos ug residente sa Relocation Site Calaanan, Brgy Canitoan ning syudad.
Matud ni SP02 Allen Sambaan Tamayo, imbestigador sa Lumbia Police Station nga nakonsenya ang suspect hinungdan nga mitahan kini.
Gani, misuway pa kini paghikog tungod sa krimen nga iyang nahimo.
Hisayran nga napatay sa suspect ang biktima nga si Elmer Mirasol, 40 anyos minyo ug residente sa Zone-3 Brgy Bayabas ning syudad human wala mibayad sa gikaong balot.
Nangayo’g pasaylo si Dulawta sa pamilya sa napatay’ng biktima.
Si Dulawta miingon nga dili niya intensyon nga patyon ang biktima.
Napugos siya sa pagdunggab niini tungod kay gibastos siya sa biktima kauban ang duha ka mga kauban niini.
Self defense lamang matud pa ang iyang nahimo ilabina nga gibinuangan sa mga hubog ang iyang baligyang balot.
