CAGAYAN DE ORO CITY – Wala na kinahanglana nga e-presyur pa si Misamis Oriental 2nd District Cong.Bambi Emano sa liderato sa kamara aron pugsong mopirma nga magtugot nga itaral pinaagi sa impeachment si Vice Pres Sara Duterte bugti sa minilyong pondo sa salapi alang sa distrito nga iyang gi-representahan.
Kini ang kabahin sa tubag ni Emano sa pag-atubang niya sa media nga nangayo’g eksplanasyon kon nganong apil siya sa 239 ka kongresista nga mipirma alang sa pagtaral ug pagpatubag ni VP Sara sa hawanan sa Senado.
Gibutyag sa magbabalaod nga mas gipili na niini nga magpakahilom apan tungod sa daghang hangyo sa nagkadaiyang sakop sa media samtang atua pa kini sa kauluhan,rason nga gihinagbo niya sa wala pa mo-diritso’g uli sa lalawigan alang sa maong katuyuan.
Miingon ang kongresista nga sukad kini nakabalik sa kamara,kinaiya niini nga masiguro nga dili madehado sa tukmang pondo ang distrito dos sa kada-diskusyon sa nasudnong pondo.
Kini ang rason nga dili makiangayon nga akusahan siya nga mipirma lang kay nag-apas sa giingong saad nga ayudang pinansyal alang sa distrito niini.
Gipamugos usab niini nga dili self-serving ang ikaupat nga impeachment complaint nga maoy gi-adaptar sa plenaryo aron hataga’g pag-uyon sa mga kongresista para basehan sa pagdungog sa senado.
Gipasabot niini nga mismo sila ang nag-imbestigar sa isyu sa confidential funds ni VP Sara sa Office of the President,Department of Education ug uban pang isyu rason nakamugna sila sa pito ka articles
of impeachment ayha gisuportahan sa mayoriya sa mga magbabalaod ug gitugyan sa senado.
Una niini,wala niya igsapayan nga gibatikos kini sa social media sa nakab-ot niya nga hukom kay gibubat lamang usab nila ang ilang pag-aksyon sa lehitimong mga reklamo batok sa bise-presidente..
Kini ang una ug katapusang pagtubag ni Emano sa isyu subay sa iyang paghatod sa pipila ka sakop sa prensa nga naghangyo kaniya nga mohatag pagpasabot sa pag-endorso niini sa articles of impeachment sa senado.
Hisayrang sa 14 ka kongresista sa Northern Mindanao, pulos mibarog ug nagbaton sa tagsa-tagsa ka baruganan 12 ang nag-endorso sa mga sumbong batok VP Sara ug duha lang ang nagdumili nga sila Cagayan de Oro 2nd District Cong. Rufus Rodriguez ug Bukidnon 3rd District Cong. Jose Maria Zubiri.
