CAGAYAN DE ORO CITY, Philippines – Angol ang tulo ka tawo sa pagbangga sa mutlicab batok sa sikad-de-padyak sa Zone 1 Bantiles, Brgy Bugo ning syudad.
Base sa inisyal nga report, miagi sa sayop nga ruta ang sikad dihang nasungag kini sa Yello Isuzo Multicab nga may plate number ZAF 4186 nga gi-drayer sa suspek nga nagpaila sa ngalang “Jemuel”.
Namugos ang suspek nga nakabantay na siya sa patabo nga sikad, apan kalit napuling iyang mata ug wala makabantay nga iya nang nabanggaan ang patabo nga sikad.
Lakip sa samaran ang driver sa sikad, usa ka pasahero ug ang nagbaklay nga nursing student .
Pulos gidala sa hospital ang mga samaran samtang temporaryong gikostodiya sa Puerto Police Station ang suspek alang sa dugang interogasyon.
Hisayran nga dugay nang problema sa Brgy Bugo ug Puerto ang mga sikad nga ilegal nga gabiyahe sa sayop nga dalan apan walay gibuhat ang duha ka barangay units aron masulbad kini.
Bisan ang Roads and Traffic Administration (RTA) wala usab gapanakop aning mga sikad-de-padyak nga gabiyahe sa sayop nga ruta, gikan sa overpass sa Bugo Central School padulong sa Gaisano-Puerto.
Dakung bawal sa dalan ang tagtulo ka ligid nga sakyanan apan padayon kining ga operar sa duha ka connecting barangay.
