CAGAYAN DE ORO CITY – Pakulo ug laing hugna sa pagpang-budol ang gihimo sa Marcos administration nga namaligya’g tag-20 pesos kada-kilo sa bugas ngadto sa limitado nga ihap sa mga konsumante sa Visayas region.
Kini ang reaksyon ni Cathy Estavillo sa grupong Bantay Bigas nunot sa gipasigarbo ni Pres Bongbong Marcos nga hingpit katumanan sa iyang saad sa katawhan sa miaging 2022 elections.
Miingon si Estavillo nga dili angayang tuhuan ang gimik nga gihimo ni Marcos tungod kay dayag kining dili makalahutay nga rice subsidy program.
Siya miingon nga anaa sa sobra 15 milyones ang gipang-gutom tungod sa sobra kamahal sa palaliton apan kutob lang sa 800-mil ka tawo ang kaya mahatagan sa limitado nga subsidiya sa bugas.
