CAGAYAN DE ORO CITY – Kasuha’g cyber libel ni Lapasan Baptist Church Bishop Denvir Andales ang mga tawo nga nag-akusar kaniya nga utok sa kamatayon sa Mr. Cagayan de Oro candidate nga si Adrian Rovic Fornillos nga unang gipusil sa naka-tricab sa 13th Street,Brgy Nazareth ning syudad sa miaging Mayo 9 ning tuiga.
Kini human nanglugwa ang nagkadaiyang pasangil pinaagi sa social media posts ilabina sa Facebook nga siya ang nagpasugo nga kutlu-ag kinabuhi si Fornillos kinsa dunay trato nga babaye nga nabaniug nga ka-relasyon usab ni Andales.
Miingon si Andales sa interbyu sa Bombo Radyo nga nakurat siya pag-ayo sa pasangil kay wala siya makaila kang Fornillos ug naila lang usab niya ang uyab niini pinaagi ra sa iyang higala kaniadto.
Siya miingon nga kon tinud-anay nga apil kini sa maong kremin,nganong naabtan na lang sa tulo ka bulan sukad sa hitabo wala gihapon kini ipatawag sa kapolisan aron kuhaan sa panig niya sa tuyo nga maka-depensa usab sa kaugalingon.
Kini ang rason nga naglibog siya kon nganong naapil ang iyang giampingan nga pangalan sa dugay nang panahon dinhi sa dakbayan.
Sa pagkakaron,wala pa siya’y nakit-ang pinaka-rason kon nganong gipugos pag-konek ang iyang pagkatawo ngadto sa maong kremin.
Kini ang rason nga mokaso sila’g kriminal sa tanang nag-akusar,nagbugal-bugal ug nagguba sa iyang maayong imahen sa dakbayan.
Dumduman usab nga halos kanunay dunay social media posts ang pamilya ni Fornillos nga nagpaninggit sa hustisya alang sa pinangga nila nga anak.
Gani,may socmed posts usab ang uyab ni Adriane diin nangindahay usab sa dinaliang hustisya sa hitabo.
Una nang nagsulti ang kapolisan nga ‘crime of passion’ ang kamatayon ni Fornillos.
Apan sulti usab sa pipila ka mga abogado nga hangtod nga walay direktang mga basehan ug mga testigo ang tanang mga pasangil,pabiling tsismis lamang kini ug magukod sa kaso ang mga nagpakatag sa malisyosong impormasyon.
