Tungod kay walay bisan unsang balaod nga gipagawas gikan sa kaulohan o sa nasudnong kagamhanan nga nag‑ingon nga i‑oktaba ang Barangay ug Sangguniang Kabataan (BSK) Elections, gipasabot ni Atty. Ramil Acol, City Election Officer sa ikaduhang distrito sa Cagayan de Oro, nga madayon gayod kini karong umaabot nga Nobyembre.
Subay sa iyang pamahayag, ang tanan nilang timeline ug mga pagpangandam sa Comelec nakatutok na alang sa maong piniliay.
Gipatin‑aw usab niya nga ang mga bag‑ong narehistro nga botante magamit gihapon ang ilang rehistrasyon hangtod sa kahangturan gawas lang kon mobalhin sila og laing dapit.
Gipasalig ni Acol nga dako na ang nagasto ug natrabaho sa ilang buhatan, hinungdan nga wala nay rason nga dili madayon ang eleksyon.
Dugang pa niya, sa pagkakaron limpyo ug walay nakitang problema o iregularidad sama sa tinuyo nga pagbalhin‑balhin sa mga botante sa tibuok ikaduhang distrito sa dakbayan.
