CAGAYAN DE ORO CITY – Nasagulan sa rambol ang masadyaon unta nga awarding ceremony sa liga sa basketbal sa Brgy Bugo, ning syudad kagabii.
Nahitabo ang insidente sa besperas sa pista sa barangay diin, personal nga gikompirmar ni Bugo Brgy Chairman Spencer Cailing ang kagubot sa Bombo Radyo.
Gi-report ni Cailang nga nagsugod ang komosyon dihang gisiko sa usa ka player ang iyang kaatbang atol sa awarding of prizes.
Wala nakontrolar ang duruha sa ilang mga teammates busa milanding kini sa dakung komosyon.
Gisuta pa sa kapitan kung pila ang ihap sa mga samaran nga nadala sa ospital.
Naabtan pa sa pipila ka minuto ayha kontrolar ang sitwasyon sulod sa gynmasium kagabii.
Dugtong niini,mipasidaan si Cailing sa mga mi-inisyar sa kagubot nga manubag ug posibleng pasakaan sa kaso human sa ilusad nga imbestigasyon sa mga otoridad ug subay sa rekomendasyon sa kapolisan.
Gitin-aw ni Cailing nga “banned” na ang basketball team nga nagpasimuno sa kagubot.
Subli nagpadumdum ang kapitan, kinsa usa usab ka pastor sa maong barangay nga unta, ipatigbabaw ang sportsmanship ug pagpinasaylu-ay kung dunay nabiling kayugot human sa dula.
