CAGAYAN DE ORO CITY – Wala gikalisang ni Davao City Mayor Sebastian ‘Baste’ Duterte nga siya suspensuhon sa katungdanan nunot sa ilang mga pagbatikos sa administrasyon ni Pres Bongbong Marcos pinaagi sa mga paglusad sa Hakbang Maisug rally sa pipila ka bahin sa nasud.
Kini ang kabahin sa unod sa mensahe sa batan-ong Duterte dihang nakigpulong siya atubangan sa katawhan nga mitambong sa ilang rally sa gym sa Brgy Agusan ning syudad sa miaging Sabado sa gabii.
Namahayag si Duterte nga dili mahimong magpakahilom ang katawhan nunot sa pipila ka hiwi nga palisya nga gipatuman sa administrasyon.
Siya miingon nga nagsilbi kining center-left diin nagkahulugan nga dapig siya sa katawhan apan wala usab isalikway ang diwa sa demokrasya samtang kontra ang pipila ka opisyales sa gobierno nga naghimo’g mga hinangal.
Una nang gisaway sa mayor ang pakyas ug nasapon nga people’s initiative sa administrasyon, paggamit sa isyu sa West Philippine Sea ug ang saad nga walay katumanan kabahin sa pagbarato sa bugas balor 20 pesos kada-kilo.
Hisayrang nagdumili paghatag permiso ang city govt sa permit sa rally sa grupo kay giingong nahadlok usab kini nga sunod pang-suspensuhon sa Malakanyang ang pipila ka dagkong opisyal sa Cagayan de Oro City.
