CAGAYAN DE ORO CITY – Kasuhan sa murder ang basurero nga gitudlo sa kabanay ug kapolisan nga giingong mipatay sa 32 anyos nga tomboy sa Tamparong Compound,Barangay Puntod,Cagayan de Oro City.
Kini human kusganon ang pagtoo sa pamilya sa biktima nga si Rachel Manahan,dalaga nga ang 42 anyos nga si Daniel bagobaldo nga residente sa maong dapit ang mipatay niini sa miaging Hulyo 22 sa gabii.
Miingon si Macabalan Police Station commander Police Capt Jack Llaneta nga gihulat nila ang resulta sa otopsiya sa Scene of the Crime Operatives aron magamit pagduso kasong pagpatay sa suspek sa piskalya ning syudad.
Saysay ni Llaneta nga gusto usab nila masuta sa otopsiya kon gilugos ba sa suspek ang biktima sa wala pa patya sulod sa iyang payag sa maong compound.
Una nang nagtoo si Gaspar Manahan kinsa igsoon ni Rachel nga gilugos una ang ilang manghod ayha gipatay sa suspek.Si Rachel ang lima ka adlaw nga gipangita human na pakyas makauli sa ilang pinuy-anan gikan sa pag-out sa trabaho isip kahera sa gasoline station sa Gaabucayan Street ning syudad niadtong Lunes sa gabii.
Nadiskobre lamang ang dugta na nga lawas sa biktima dihang mismo ang kabanay niini ang nakaabot sa Tamparong compound diin gibutang sa septic tank ug gitabunan aron dili makita sulod sa barong-barong.
Una niini,hilingon na unta sa SOCO personnel ang hubo nga lawas sa biktima nga nakasulod sa sako dihang napugos pagtunga si Bagobaldo sa gitaguan niini nga duol lamang sa crime scene hinungdan nahitabo ang ginukdanay hangtod kini nadakpan.
Mismo ang grupo ni Llaneta nga kabahin sa migukod kang Bagolbaldo ang nakaluwas niini gikan sa sobrang kasuko nga kabanay ug mga residente batok kaniya.
Paspas kining gisakay sa police patrol car padulong sa estasyon aron makalikay sa nagpungasi nga mga kinomo gikan sa nasuko kaayo nga katawhan gumikan sa nahitabo sa biktima.
Dumduman nga samtang kamulong baklay ang suspek pasakay sa patrol,nakasulti pa kini nga gisugo lamang daw siya sa maong kremin.
Hisayrang unang nataho sa Bombo Radyo ang pagka-missing sa biktima diin sa pagkabuntag na sa petsa 27 sa Hulyo 2019 nakita sa mga paryente ang iyang patay’ng lawas nga pugos gipasok sa septic tank ug gitabunan aron dili dali madiskobre sa mga nangita niini.
