Nadakpan sa kapulisan sa Iligan City ang usa ka batan-ong lalaki nga gituohang mi-eskapo sa Regional Rehabilitation Center for Youth (RRCY) sa Gingoog City, human sa sumbong sa usa ka residente sa Barangay Buruun.
Ang batan-on natultolan sa Prk 1B, Buruun, diin siya gitug-an nga nagtagotago. Sa koordinasyon sa RRCY-Gingoog, gikumpirma nga ang batan-on usa ka Child In Conflict with the Law (CICL) ug tinuod nga mi-eskapo sa pasilidad.
Sa operasyon sa Iligan City Police Station 2, nakuha gikan sa batan-on ang usa ka medium-size nga plastik nga adunay sulod nga gituohang ilegal nga droga nga shabu. Nasikop na ang maka-eskapo ug laraw nga ibalik sa rehabilitasyon aron padayon nga matabangan sa iyang pagbag-o.
Sumala ni Police Major Zandrex Panolong, ang tagpamaba sa Iligan City Police Office, dako ang papel sa mga alertong residente sa pagtabang sa kapulisan.
“Ang sumbong sa katawhan usa ka hinungdanon nga lakang aron mapadayon ang hustisya ug mahatagan og ikaduhang higayon ang mga kabatan-onan nga nasayop sa dalan,” matod pa niya.
