CAGAYAN DE ORO CITY – Dili kasilik-an ang pagsilbing sakop sa minoriya sa konseho ni Cagayan de Oro 2nd District City Councilor Yvy Emano sa pagpalapad sa pag-alagad sa katawhan sa dakbayan.
Kini human pilia sa 12 ka konsehal si Emano aron magsilbing bise-presidente sa Philippine Councilors League/PCL-Cagayan de Oro chapter sa ilang gilusad nga eleksyon sa usa ka hotel ning syudad kagahapong adlawa.
Matud sa batan-ong Emano nga naghatag sa dugang kadasig kaniya ang maong obligasyon pag-alagad sa matag-Cagayanons.
Una niini,misulay lang kini pagpapili pagka-bise-presidente sa liga ug ulahi niya nasayran nga walay kontra kay nagbinugtong siya nakaduso sa iyang kandidatura.
Kini ang rason nga nakakuha siya’g 12 ka boto gikan sa mayoriya nga naghatag sa ilang pagsalig ug kumpiyansa aron abagan si Cagayan de Oro 2nd District Councilor Alam Lim nga bag-o nila nga pangulo sa PCL-CdeO chapter.
Si Yvy ang pinakabatan-on sa mga Emano sa serbisyo-publiko nga unang giunhan nila House Deputy Speaker/Misamis Oriental 2nd District Rep. Bambi Emano ug Tagoloan Mayor Atty. Nadya Emano-Elipe.
Si Lim nakakuha’g 11 ka boto samtang ang miatbang kaniya nga si 1st District City Councilor Roger Abaday ang nagbaton usab sa 7 ka konsehal nagsuporta kaniya.
Nagsilbi usab nga kalihim sa liga si Kag. Des Dahino;tresurera nila si Kag. Gigi Go;auditor si Antoy Pascual; PRO si Kag. Jonjon Rodriguez samtang sila Kagawads Edgar Cabanlas,Paolo Gaane,Eric Salcedo,Al Legaspi ug Jing Daba ang mga city director.
