CAGAYAN DE ORO CITY – Sentro sa batikos ni incumbent City Mayor Rolando ‘Klarex’ Uy ang daw paghikaw ni former city mayor Atty Oscar Moreno sa katawhan sa gihatag nga ayuda gikan sa nasudnong kagamhanan dihang grabeng naigo sa pandemya sa COVID-19 ang dakbayan.
Kini atol sa ilang pagdalikyat sa Brgy Pagalungan alang sa senemana nga pagpaabot sa mga batakang serbisyo nga kabahin sa programa sa kasamtangang administrasyon.
Miingon si Klarex nga nasubo siya pag-ayo sa gidangatan sa dakbayan kaniadto ilabina nga magka-alyado pa sila sa kanhi mayor dihang grabeng miigo ang pandemya.
Wala usab palabya sa mayor ang pipila ka kadalanan nga mga proyekto ni Moreno nga nangliki na kay dili ensakto ang pagka-trabaho epekto sa giingong wala pagsunod sa gimando sa DPWH.
Si Klarex ug Moreno ang gitakdang magka-atbang pagka-mayor sa 2025 elections sa dakbayan.
