Wala pa’y nahuptang opisyal nga papel ang Department of Justice kabahin sa gipasiatab ni Ombudsman Jesus Crispin Remulla nga warrant of arrest batok kang Senator Ronald ‘Bato’ De la Rosa gikan sa International Criminal Court/ICC.
Kini human unang nagsulti si Remulla nga giingong naglugwa na ang ICC sa mando de aresto kang Bato kinsa nagsilbing PNP chief sa panahon ni former Pres Rodrigo Duterte sa gipatuman nga war on drugs batok sa mga sindikato sa drag sa Pilipinas kaniadto.
Si Remulla kinsa kanhi kalihim sa DoJ ang kabahin sa mi-depensa kaniadto sa isyu sa legalidad kung nganong mitugot si Pres Bongbong Marcos nga dakpon ug itugyan si Duterte sa ICC.
Nagsumikad daw ang ICC arrest warrant batok De la Rosa sa susamang kasong crimes against humanity nga giatubang ni Duterte sa ICC.
Sa pagkutlo ning balita, wala pa’y gilugwa nga reaksyon ang kampo ni De la Rosa kabahin sa gisulti ni Remulla.
Hisayrang kontrobersyal ang war on drugs ni Duterte kay daghang kinabuhi sa mga suspected drug personalities nga nakalas epekto sa Oplan Tokhang nga gipatuman sa tibuok nasud.
