CAGAYAN DE ORO CITY – Nadakpan sa laing higayon ang usa ka 31 anyos nga babaye tungod sa pasangil nga nalambigit sa illegal recruitment ubos sa Republic Act no. 10022 sa Brgy Kalamkam,Talisayan,Misamis Oriental.
Gitumbok ni Police Regional Office 10 Director Brig Gen Jaysen De Guzman ang dinakpan sa Talisayan Police Station nga mao si alyas Mae nga taga-Brgy 21,Gingoog City ning lalawigan.
Gibutyag sa heneral nga nasignit si alyas Mae pinasikad sa mando sa korte tungod sa mga reklamo sa pipila sa mga nagsilbing biktima niini.
Nagsumikad ang reklamo sa pagdawat salapi sa suspek gikan sa mga biktima nga nagkinahanglan sa job slot reservations alang sa abroad.
Nasuta nga una na kining nadakpan sa susamang kaso niadtong Pebrero 2024 apan nakagawas kay nakaduso’g piyansa sa korte.
Kasuhan na usab ang suspek sa parehong reklamo sa piskalya ning semanaha.
