CAGAYAN DE ORO CITY – Apson sa Commission on Elections o Comelec-Misamis Oriental ang tiwasunon nila nga trabaho alayon sa bag-uhay pa nahuman nga 2025 midterm elections niadtong Mayo 12.
Kini aron mahatag na nila ang nabiling suhulan o honoraria alang sa tanang mga naglangkob sa board of election inspectors o BEIs nga nagsilbi sa malinawon nga paglusad sa piliay dinhi sa syudad ug lalawigan.
Miingon si Atty. Carlito Ravelo,provincial election supervisor sa Comelec-MisOr nga gihuman nalang nila ang pipila ka ginagmay’ng gimbuhaton aron madala ang mga dokumento padulong sa ilang kauluhang-buhatan.
Siya miingon nga mahatag nila ang mga honoraria ngadto sa dili mo-ubos 5-mil ka magtutudlo ingon man technical support personnel sa sunod semana.
Giklaro usab niini nga kung unsa man ang nalatid nga pondo alang sa BEIs,kini lang ang mahatag ug wala na’y lain.
Gihimo ni Ravelo ang pahayag kay nasampit man ni Budget Secretary Amenah Pangandaman nga gimanduan kini ni Pres Bongbong Marcos nga adunay dugang 2-mil pesos nga madawat pa ang BEIs.
Miingon kini nga hangtod nga adunay kamanduan gikan sa Comelec-Manila,ayha pa usab sila makahimo’g aksyon alang niini.
