Aminado ang buhatan sa NFA Misamis Oriental nga nag‑atubang sila og daghang reports sa pagpangabusar ug pagpangilad pinaagi sa pagsumite og peke nga IDs ug sa giingong pagbaligya sa P20 nga bugas sa mas mahal nga kantidad.
Giila kini nga dakong hagit sa implementasyon sa programa.
Matod ni Kharren Retiza, acting branch manager sa NFA Misamis Oriental branch, kini nga mga isyu nagapalisod sa hapsay nga distribusyon ug nagkinahanglan og mas istriktong validation sa mga dokumento sa mga benepisyaryo.
Dugang pa niya, sugod sa katapusan sa Pebrero misaka ang gidaghanon sa mga tawo nga nag‑avail sa programa, nga nakaapekto usab sa sistema sa pila ug pagproseso sa mga transaksyon.
Padayon matod pa ang buhatan sa pagpasiugda sa monitoring ug pag‑koordinar sa DSWD ug LGU aron masiguro nga angay ug tinuod ang makabenepisyo sa maong subsidiya nga bugas.
Tungod niini, nagpadayon ang NFA sa paghimo og mga paagi aron mapugngan ang abuso ug mapalambo ang serbisyo alang sa mga tinuod nga benepisyaryo sa P20 rice program.
