CAGAYAN DE ORO CITY-“Best security” Kini ang gihimong paghulagway sa Cagayan de Oro City Police Office o COCPO sa ilang gihimong pagpangandam sa seguridad nga ipatuman atol sa Traslacion sa Itom nga Nazareno karong adlaw’ng Martes.
Si C/Insp Mardi Hortillosa, tigpamaba sa COCPO miingon nga pahugtan nila ang seguridad sa syudad atol sa maong kalihukan tungod sa taas nga bahad sa terorismo hinungdan nga gipaubos sa Martial Law ang Mindanao.
Kini ang pagpahupay sa kabalaka sa mga deboto sa traslacion sa Itom nga Nazareno kalabot na sa bahad sa terorismo sa syudad.
Matud ni Hortillosa nga dili angayang kahadlokan sa publiko ang ilang gipatuman nga hugot nga seguridad tungod kay igo lamang sila naneguro nga dili malusotan sa mga terorista.
Siya miingon nga bisan ang mga dagkong kanasuran ang gakalusotan gihapon sa mga terorista tungod sa ilang mga talagsaong stratehiya.
Samtang mihimo sa panawagan si Hortillosa sa publiko nga sundon ang mga gabayan nga gipaggawas sa kapulisan kalabot na sa mga do’s and dont’s atol sa traslacion sa Itom nga Nazareno.
Sumala sa maong tigpamaba nga magmalinawon ang kasaulogan sa maong aktibidadis kung mosunod lang ang publiko paglikay sa mga idili atol sa himoong prusisyon.
Pipila sa mga gidili sa kapulisan ang pagsoot sa kalo, antipara, pagdala og bag, pagpamaligya daplin sa dalan ug daghan pang uban.
