CAGAYAN DE ORO CITY – Gitumbok sa Bureau of Fire Protection o BFP ang naghinobrang kainit sa adlaw nga miigo sa kalibutan ang usa sa mga rason kon nganong sunod-sunod ang pag-igo sa sunog dinhi sa dakbayan.
Kini human mitala sa dagkong mga sunog nga naglakip sa pagkasunog sa kabalayan sa Brgy Carmen ingon man commercial arcade sa miaging Enero ug laing pagka-abo sa residential areas sa Brgy Puntod ingon man Brgy Macabalan ning bulana.
Miingon si Fire Insp Sam Velarde,tigpamaba sa BFP Cagayan de Oro District nga ang gibuga nga kainit sa adlaw ang tipik sa nakapa-trigger kon nganong paspas modakop ang kalayo sa mga butang nga dali ra taptan usab sa kalayo.
Samtang mitala’g taas nga ihap sa mga tawong nangamatay ang halos 300 ka dagkong sunog sa syudad sa miaging tuig 2023.
Kini human kompirmaha ni BFP Cagayan de Oro District spokesperson Fire Insp Sam Velarde nga anaa sa 15 ka tawo ang namatay nga naglakip sa duha ka pamilya nga nalukong sa Brgy 34 ug Brgy Indahag sa maong tuig.
Siya miingon anaa usab sa sobra 30 ang samaron sa laing mga sunog nga naglakip sa ilang duha ka bombero samtang kapin 23 milyones pesos ang natala nga estimated structural damages.
