CAGAYAN DE ORO CITY-Nagbahad ang Bangsamoro Islamic Freedom Fighters o BIFF nga magpabilin ang ilang himoong pagpangatake batok sa gobyerno sa tibook Mindanao.
Kini bisan pirmado na ni Pres Rodrigo Duterte ang Bangsamoro Organic Law o BOL.
Matud ni BIFF spokesperson Abu Misri Mama nga dili solusyon sa kagubot sa Mindanao ang BBL ug dili kini sulbad sa kagubot tungod kay mga lider lamang sa nasud ang makapahimulos niini.
Gusto ni Mama nga Islamic State ang tukuron sa gobyerno ug dili ang BOL.
Gitin-aw usab ni Mama nga supak sila sa BOL tungod kay adunay balaod niini ang wala ka makasunod sa Koran.
Siya miingon nga kini ang rason kon nganong mibulag sila sa Moro Islamic Liberation Front tungod kay wala sila makaangay sa programa sa gobyerno.
Asoy niini nga bisan paman gihatagan na’g otonomiya ang mga Maranao-Muslim sa maong balaod, dili gihapon sila kontento hangtud dili matukod ang Islamic State.
