CAGAYAN DE ORO CITY-Hugot nga gipanghimakak sa Bangsamoro Islamic Freedom Fighters o BIFF ang alegasyon nga sila ang responsable sa pagpamomba sa Tacurong City nga miangol sa 16 ka tawo sa miaging adlaw’ng Lunes sa gabii.
Sa pakighinabi sa Bombo Radyo, gibutyag ni BIFF spokesperson Abumama Misry nga dili sila ang responsable sa maong pagpamomba ug posibleng hinimoan kini sa laing pundok.
Matud ni Misry nga gawas sa ilang pundok, daghan pang grupo nga naglihok sa Central Mindanao ang adunay kapas mamomba.
Dugang ni Misry nga bisan ang kapolisan ug militar ang pwedeng matumbok nga responsable sa pagpabusikad ug bomba sa Tacurong City.
Una nang samaron ang pipila ka sundalo,pulis ug mga sibilyan tungod sa pagbusikad sa tulo ka Improvised Explosive Devices o IEDs nga hinimuan sa BIFF.
Sa nasagap usab sa mga otoridad nga nagtigom ang BIFF kuyog ang ubang mga terorista aron planuhon ang pagpabuto sa 10 ka bomba sa pipila ka nag-unang sa syudad sa Mindanao.
Sa pikas bahin,may gipatuman nang contingency plan ang kadagkuan sa PNP region 10 aron dili mabiktima sa pagpamomba ang mga lugar sa Amihang Mindanao sama sa nahitabong pagpamomba sa Tacurong City nga miangol sa 16 ka tawo.
Matud ni PNP-10 spokesperson Supt. Lemuel Gonda nga kabahin sa ilang contingency plan ang paghatag hugot nga seguridad sa mga publikong lugar sama sa shopping malls, airports, bus terminals, pantalan ug kasimbahanan.
Si Gonda miingon nga mas gihugtan usab sa kapolisan ang ilang checkpoints uban sa militar aron dili molampos ang posibleng plano sa mga terorista ngan mamomba ilabina dinhi sa syudad ug lalawigan.
Gihangyo ni Gonda ang publiko nga motabang sa ilang paningkamot nga dili mabiktima sa pagpamomba ang Amihang Mindanao.
Miingon si Gonda nga dako kaayo ang papel sa katawhan isip intelligence community diha sa pagsanta sa posibleng plano sa mga teroristang grupo.
Si Gonda namahayag nga makatabang ang katawhan ngadto sa kapolisan pinaagi sa pag-report kon ugaling may mamatikdan silang mga tawong kadudahan ug lihok sa ilang tagsa-tagsa ka mga barangay alang sa tukmang aksiyon.
Dugtong niini,gipangayo usab sa kadagkuan sa Cagayan de Oro City Police Office o COCPO ang kooperasyon sa publiko alang sa ilang hugot nga pagbantay sa dakbayan batok sa posibleng hadla sa terorismo.
Matud ni COCPO spokesperson C/Insp. Mardy Hortillosa II nga dili makaya sa kapolisan ang pagbantay sa peace and order sa syudad kon wala ang kooperasyon ug supporta sa katawhan.
Si Hortillosa miingon nga nakigtagbo na si City Police Director. Sr/Supt. Roy Bahian ngadto sa mga negosyante dinhi sa syudad aron sila makatabang sa kapolisan sa pagbantay sa ilang tagsa-tagsa ka mga establisemento batok sa posibleng planong pagpamomba sa mga teroristang pundok.
